Свечено поставен камен темелник на новата спортска сала во ОУ Св.Климент охридски во Делчево

Во сабота, на 15.01.2011 година, во дворот на Основното училиште „Св.Климент Охридски“ во Делчево беше поставен камен-темелник на новата спортска сала. Изградбата на овој капитален објект  се реализира во соработка на Министерството за образование и наука при Владата на Република Македонија, со ЕЛС Делчево и претставува дел од Проектот на ова Министерство за изградба на 145 спортски сали на територијата на државата.

 

 

На почетокот, на присутните им се обрати директорот на ОУ „Св.Климент Охридски“ од Делчево, г-динот Мирко Стоименовски, кој ја изрази својата благодарност до надлежните институции за реализацијата на овој проект. На свечениот чин на поставување на камен-темелникот присуствуваше Министерот за образование и наука на Република Македонија, г-динот Никола Тодоров, кој во своето обраќање пред многубројните присутни граѓани и вработени во ОУ „Св.Климент Охридски“, го истакна огромното значање од реализацијата на овој проект, како и нескриеното задоволство што граѓаните масовно ја користат новоизградената спортска сала во дворот на СОУ „М.М.Брицо“, за која се чека термин повеќе за нејзино користење.

По обраќањето на Министерот, на присутните им се обрати Градоначалникот на Општина Делчево г-дин Горан Малешевски, кој ја искажа својата голема благодарност од името на граѓаните на општина Делчево, за изградбата на овој капитален објект, втор од ваков обемен и наменски карактер.

Со изградбата на овој втор спортски капитален објект, за две години по ред, Владата на Република Македонија ја демонстрира својата посветеност и решеност во напорите за реализација на својата предизборна програма со која излезе пред граѓаните во претходниот изборен циклус. На  присутните граѓани, наставници и професори им се обрати и пратеникот во македонскиот парламент, г-динот Влатко Ѓорчев, кој ја поздрави изградбата на овој објект осврнувајќи се на практичните придобивки од реализацијата на новата спортска арена, преку, социолошките аспекти, здравствените, општествените, како и бенефитите во насока на изградба на  психо-физички здрави млади генерации, како алтернатива на пороците кои со себе ги носи современото општество.

По свечениот чин на поставување на камен-темелникот на новиот спортски објект во Делчево, во дворот на училиштето беше приреден свечен коктел по што присутните гости од Парламентот и Министерството имаа куса прошетка низ Делчево, во придружба на Градоначалникот, Претседателот на Советот на Општина Делчево, директори на училишта и други јавни институции.

Оваа содржина е заклучена. Не е можно коментирање на оваа статија.